(ဂ) စိန်မေရီ ယာယီ ဘုရားကျောင်းဆောက်လုပ်ခြင်း

 (ဂ) စိန်မေရီ ယာယီ ဘုရားကျောင်းဆောက်လုပ်ခြင်း

            Fr. Dixneuf သည် ချင်းပြည်နယ် ကက်သလစ်သာသနာ ဖွံ့ဖြိုးတိုးတက်ရန်အတွက် အခြေခံလိုအပ်ချက် ဖြစ်သော စိန်မေရီစာသင်ကျောင်း (ယခု အထက (၃) ဧရာဝတီဆောင်) နှင့် ဘုန်းတော်ကြီးနေအိမ်များကို ဦးစားပေးဆောက်လုပ်နေရသဖြင့် ဘုရားရှိခိုးကျောင်း ဆောက်လုပ်ရန် အချိန်မပေးနိုင်ခဲ့ပေ။ ၁၉၆၆ ခုနှစ်တွင် Fr. Peter U Mya Aung တာဝန်ကျ ရောက်ရှိလာသော်လည်း သာသနာပိုင်မြေနှင့် ပတ်သက်၍ အငြင်းပွားနေဆဲ ဖြစ်သောကြောင့် ဘုရားကျောင်းဆောက်လုပ်ခွင့် မရရှိသေးပေ။ ထို့ကြောင့် Fr. Peter U Mya Aung ရောက်ရှိပြီး (၃) နှစ်ခန့်ကြာသည့်တိုင်အောင် ဘုရားရှိခိုးကျောင်း မရှိသေးဘဲ ဓမ္မဆရာ Mark Cin Khan Khual ၏ နေအိမ်တွင်သာ ဆုတောင်းဝတ်ပြုခြင်းများ ပြုလုပ်ခဲ့သည်။ ၁၉၆၉ ခုနှစ် ရောက်မှသာ သာသနာမြေအမှုကိစ္စ ပြီးပြတ်နိုင်ခဲ့သည်။ ထိုအချိန်တွင် သာသနာမြေ၏ လေးပုံသုံးပုံ ဆုံးရှုံးခဲ့ပြီးဖြစ်သည်။ ထို့ကြောင့် ကျန်ရှိသော မြေကွက်ပေါ်တွင် ယာယီဘုရားရှိခိုးကျောင်း ၇၂’ x ၃၆’ ဆောက်လုပ်ခဲ့သည်။